當我中學係Marian Building窗邊，用係屋企偷嘅傳真機捲紙寫歌嘅時候，嗰陣胡亂想像嘅未來好似已經唔會係香港發生，我總係覺得我係會離開香港，香港只係盛載我嘅器皿之一，其實說到底應該係無咩歸屬感，嗰陣我最最最鍾意嘅係台灣。

到中學畢業，大部分好友全部去曬外國，剩返我，家人話唔係唔去得，賣咗層樓就得，個一下，我好似第一次發現，原來要離開香港唔係想像中咁容易，就算你無好attach依個地方，要離開一個地方，比你要從一個曾經密不可分嘅圈子抽身而退，比起你要相信你可能就係會平凡地日復日過完啲日子，比起你要接受你曾經仰賴嘅師長其實一直都係透過你展示佢嘅蠻權，原來係難咁多。

同一個時間點，有個曾經嘅密友話佢可能可以去外國讀書，去唔去好，就算當時我知道佢去咗我地就關係就唔會維繫到，我都係同佢講咗句，你去啦，幾多人想去無得去。當然佢最後係去咗，而佢依家都唔再係我圈子嘅人，其實依家回想，我當時都幾羨慕佢。

到大學，終於終於可以去外國生活一段短嘅時間，幾乎係令我一秒決定我係要離開香港嘅，我一定要搵辦法離開，就算我已經開始鍾意咗佢，開始研究佢嘅文學電影，會想去講佢嘅劇場遊歷，會去睇佢嘅歷史，甚至係參與到佢嘅兩個歷史轉折點，睇住佢由芳華絕代變成此情不再，到面目全非杜口無言。

然後，係見唔到尾聲嘅時代革命中，我好似終於真係要離開香港了。

–

寫依篇嘢個日，我對我自己要離港其實完全未有計劃，個日好似只係一個平凡要返工嘅一日，因為壞𨋢等咗好耐，突然個腦有啲想法急忙記下，夜半又因為整唔走個啲想法，連夜整理寫低。

後來，發生咗好多堅定咗我要離開嘅事（我就不一一詳談），但屢次我要真係做出一啲會推動我離港進程嘅動作時，我都不禁問自己：
我算唔算係逃跑？
我會唔會後悔？
我係唔係對自己過份自信？

要說服自己唔應該走嘅理由其實真係好多好valid，但要走嘅理由，總括黎講只有一個：就係，我今次真係想真正為自己做一個決定，並且去承擔依個決定嘅所有後果。可能對好多人黎講，依個消息黎得好急，但相信我，成件事對我自己黎講都係好急，好不可思議。

離開之前，我都想見大家一面（或者我地已經見咗），食個飯或者係一齊睇一套戲，睇一個展覽，又或者係去一個你未去過嘅地方，做一件你想試但未試過嘅事未試過嘅嘢（歡迎wine tasting），我想若干年後，有人提返某套戲某件事某樣嘢，你會記得係同我一齊做嘅。同埋，大家睇下有無興趣收養我部份藏書（via https://bit.ly/3uSubg0）。

最後嘅最後，雖然依個並非係我地之間嘅告別，但我都係想當係最後一次咁去做，好好咁去做，let’s do it together。

P.S. 係啊，之後嘅近況，我會用依個平台繼續upload近況，可能無咁人會花咁多心機去入password黎睇，但我都想為自己做一個紀錄。